सप्तमी तिथि आइतवार भए पनि छठ पर्व सोमवारसम्म, नदी तथा जलाशय झकिझकाउ

मंसिर २, २०८० शनिबार ७:४७:५ | उज्यालो सहकर्मी

काठमाण्डाै - सप्तमी तिथि भोलि भए पनि छठपर्व पर्सि सोमवारसम्मै मनाइने भएको छ । कात्तिक शुक्ल चतुर्थीदेखि सप्तमीसम्म छठ पर्व मनाउने गरिन्छ ।

यो परम्पराअनुसार हिजो चतुर्थीदेखि छठपर्व शुरु भएको छ । यसपालि तिथिको घटबढका कारण आज पञ्चमी र षष्ठी तथा भोलि षष्ठी र सप्तमी तिथि परेको छ । तिथि घटबढ भए पनि यसवर्ष पनि पहिलेजस्तै चार दिन नै छठ पर्व मनाउने तयारी भएको छ ।

भोलि सप्तमी तिथि भए पनि पर्सि सोमवार बिहान उदाउँदो सूर्यको पूजा आराधनासहित अर्घ्य दिएर छठ पर्व समापन हुने संस्कृतिविद् डाक्टर वीरबहादुर महतोले उज्यालोलाई जानकारी दिनुभयो ।

पशुपति क्षेत्रमा रहेकाे गौरीघाटचोकबाट गुह्येश्वरी मन्दिरसम्म बाग्मती सफाइ गरी छठका लागि सजावटको तयारी गरिँदै ।

छठ पर्वको मुख्य दिन भोलि अस्ताउँदो सूर्यलाई पूजा आराधनासहित अर्घ्य दिइन्छ । यसका लागि निराहार व्रत बसेका वर्तालुले भोलि रातभर छठ पूजास्थलमा जाग्राम बसेर उदाउँदो सूर्यको प्रतीक्षा गर्ने गर्छन् ।

छठ पर्वको दोस्रो दिन आज खरना गरिँदै छ । आजको दिन बिहानै घर आँगनको सफाइ गरी व्रत गरी बेलुकी सखरमा पकाएको खिर खाइन्छ । यस दिन ठेकुवा, भुसुवाजस्ता परिकार पनि बनाइन्छ । छठमा बाँसका सामग्री, उखु, केरा, सुन्तला, स्याउआदिको बढी प्रयोग गरिन्छ ।

छठ पर्व शुरु भएसँगै तराई मधेस र काठमाण्डौ उपत्यकाका नदी, तलाउ र जलाशय झकिझकाउ भएका छन् । जलाशयमा बनाइएका आकर्षक घाट र त्यहाँको चहलपहलले सबैलाई आकर्षित गरेको छ । मिथिला क्षेत्रका बासिन्दा सडक, ढल सफा गर्न जुटेका छन् । काम गर्न टाढा पुगेका परिवारजन पर्वका लागि घर आएका छन् । पर्वले सबै परिवारजन र आफन्तसँग भेटघाट गराएको छ ।

सूर्यलाई अर्घ्य दिँदा देखाइने ठकुवा, भुसुवालगायत परिकार पकाउन आवश्यक सामग्रीको जोहोमा वर्तालु परिवार व्यस्त छन् । पर्वका लागि आवश्यक सामग्रीको जोहो हुँदैछ । काठमाण्डौका नदी पोखरीमा पनि छठको तयारी भइरहेको छ ।

पशुपति क्षेत्रको गुह्येश्वरी मन्दिरबाट–गौरीघाट चोकसम्म दीपावलीअघिदेखि नै झिलिमिली बत्तीले उज्यालो बनाइएको छ । बाग्मती नदी किनारका दायाँबायाँ फूलमालालगायत सामग्रीले आकर्षक रुपमा सजावट गर्ने गरी तयारी गरिएको छठ पूजा समिति, गुह्येश्वरीले जनाएको छ । हरेक वर्ष छठ पर्वका अवसरमा गुह्येश्वरी–गौरीघाटलगायत काठमाण्डौका अरु ठाउँमा पनि सजाउने गरिन्छ ।

यस वर्ष गुह्येश्वरीबाट गौरीघाटसम्मको बाग्मती नदी किनारको दायाँबायाँ, कमलपोखरी, थापाथली, नख्खु खोला, विष्णुमती र बाग्मती नदी तथा बल्खुखोला किनार लगायतका ठाउँमा छठ घाट निर्माण गरी सजाउन थालिएको छ । यी ठाउँमा छठ घाटसँगै छठी माताको माटाको मूर्ति पनि निर्माण गर्न लागिएको छ ।

कमलपोखरीमा पनि सजावट गरी छठ घाट निर्माणलाई तीव्रता दिइएको छ । रानीपोखरीमा भने यस वर्ष पनि छठ पर्व नहुने भएको छ ।

सबै तस्बिर : रासस

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

सप्तमी तिथि आइतवार भए पनि छठ पर्व सोमवारसम्म, नदी तथा जलाशय झकिझकाउ

जनकपुरधामको धनुष सागरमा छठ पूजाका लागि सजाइएको छठ घाट ।

तपाईको प्रतिक्रिया